മൊസുളിലെ (Mosul)അല്- മുത്തമൈസത്ത് ഗേള്സ് ഹയര് സെക്കന്ററി സ്കൂളിലെ ഏറ്റവും മിടുക്കിയായ വിദ്യാര്ത്ഥിനിയായിരുന്നു അവള്. അദ്ധ്യാപകരുടെ കണ്ണിലുണ്ണി. സഹപാഠികളുടെ ആത്മ മിത്രം.
മൊസുള് യുനിവേഴ്സിറ്റിയില്, വൈദ്യശാസ്ത്രത്തില് ഉപരിപഠനം നടത്തണമെന്നായിരുന്നു അവളുടെ ആഗ്രഹം.
- എപ്പോഴും ഭംഗിയായി ചിരിച്ചു കൊണ്ട്, ഒരു ചിത്ര ശലഭത്തെപ്പോലെ, പാറി നടന്നിരുന്ന അവള്, കുടുംബത്തിലെ വെളിച്ചമായിരുന്നു. മമ്മയുടെ മുഖച്ഛായയാണ് അവള്ക്ക്. അത് കൊണ്ട് തന്നെ എല്ലാവര്ക്കും പ്രത്യേക വാത്സല്യവും- പിന്നെ, ഞങ്ങള് മൂന്നുപേരില് ഇളയവളുമാണല്ലോ.
ബാബ എപ്പോഴും പറയും:
" റോബ്ജിന്, നീ വേണം ഇവരുടെ കാര്യങ്ങളെല്ലാം നോക്കാന്. മമ്മയില്ലാത്ത കുട്ടികളാണ്...."
എട്ടു വയസ്സു കാരനായ രക്കാനെയും മുന്നു വയസ്സു കാരിയായ രഹാനയെയും പതിമൂന്നുകാരിയായ തന്നെയെല്പ്പിച്ചിട്ടു മമ്മ പോയി. ഇറാന് യുദ്ധകാലത്ത് എപ്പോഴോ പാകിയ ഒരു കുഴി ബോംബു സ്ഫോടനത്തിലായിരുന്നു മമ്മക്ക് ജീവന് നഷ്ടപ്പെട്ടത്.
അടുത്തിടെയാണ് രക്കാന് ഷാമോ-ക്ക് എര്ബിലില് ഒരു അമേരിക്കന് ഓയില് കമ്പനിയില് ടെക്നിഷ്യന് ആയി ജോലി തരപ്പെട്ടത്. രഹാന ഷാമോ പതിനൊന്നാം ക്ലാസ്സിലുമെത്തി. മൊസുള് മാര്ക്കറ്റ്-ലെ ബാബയുടെ പഴം-പച്ചക്കറി ബിസിനെസ്സ് മെച്ചപ്പെട്ടു വരികയായിരുന്നു. സഹായിക്കാന് താനുമുണ്ടല്ലോ.
എത്ര പെട്ടെന്നാണ് എല്ലാം തകിടം മറിഞ്ഞത്...?
അശുഭകരമായ വാര്ത്തകള് പലതും കേട്ടിരുന്നു. എന്നാലും...
ആ രാത്രിയിലെ ആക്രമണത്തില് എല്ലാം നഷ്ടപ്പെട്ടു. സ്വരുക്കൂട്ടി വെച്ചിരുന്ന സമ്പാദ്യവും, വീടും, കടയും അങ്ങനെ എല്ലാം.
ബാബയെയും രകാനെയും അവര് ബന്ധിയാക്കിയെന്നു കേള്ക്കുന്നു. പാവം ബാബ, ഈ തണുപ്പ് കാലത്ത് ആസ്ത്മയുടെ ഉപദ്രവം കൊണ്ടു തന്നെ കഷ്ടപ്പെടുന്ന ആളാണ്... മലക്കുകളെ, അവരെ കാത്തോളണേ...!
രഹാനയെ ക്കുറിച്ച് യാതൊരു വിവരവുമില്ല. അവള്ക്കൊരാപത്തും വരുത്തല്ലേ എന്നു കണ്ണീരോടെ പ്രാര്ത്ഥിക്കാത്ത നിമിഷങ്ങളില്ല.
- എന്തിനാണ് 'തവ്സി മലെക്ക്' (Tawsi Melek) യസീദികളെ ഇങ്ങനെ പരീക്ഷിക്കുന്നത്...? അഞ്ചു നേരവും മുടങ്ങാതെ പ്രാര്ഥിക്കുന്നതാണല്ലോ?
സമാധാനപ്രിയരായ തങ്ങളുടെ സംസ്കാരത്തിന് നേരെ എഴുപത്തിരണ്ട് ആക്രമണങ്ങള് ഉണ്ടായിട്ടുണ്ട് എന്നു ചരിത്രം പറയുന്നു.... ഇത് എഴുപത്തി മൂന്നാമത്തേതാണോ...?.
അന്ന്, ട്രാക്ടര്-ഇല് കയറിയാണ് രെക്ഷപ്പെട്ടത്. കുറെ ദൂരം ഓടിയതിനു ശേഷമാണ്, ഖുര്ദിഷ് സ്ത്രീ സുരക്ഷാ സേനയുടെ വാഹനത്തിനടുത്ത് എത്തിപ്പെട്ടത്. അവിടെ നിന്നും മണിക്കൂറുകളോളം യാത്ര ചെയ്തു സിറിയയിലെ നവറുസ് YPG പട്ടാള ക്യാമ്പിലെത്തി.
യസിദി പെണ്കുട്ടികളെയും സ്ത്രീകളെയും ലൈംഗിക തടവുകാരായി ഉപയോഗിക്കുകയും, ആവശ്യം കഴിഞ്ഞാല് മാര്ക്കറ്റില് കന്നുകാലികളെ പ്പോലെ വില്ക്കുകയുമാണ് ഈ മൃഗ തുല്യരായ ക്രൂരന്മാര് ചെയ്യുന്നത്. ഒരു പെണ്കുട്ടിക്ക് പത്തും പതിനഞ്ചും ഡോളറാണ് റക്കാ (Raqqa in Syria) മാര്ക്കറ്റില് വിലയത്രേ...!
രണ്ടു ദിവസം മുമ്പാണ് ഞെട്ടിപ്പിക്കുന്ന ആ വാര്ത്ത കേട്ടത്. റക്കാ മാര്ക്കറ്റില് നിന്നു ഓടി രെക്ഷപ്പെട്ട ഒരു ക്രിസ്ത്യന് പെണ്കുട്ടിയാണ് അതു പറഞ്ഞത്...
....സിഞ്ചാര് മലനിരകളില് നിന്ന് ചാടി രഹാന ജീവനൊടുക്കി.
-കടുത്ത മാനസിക, ശാരീരിക പീഡനങ്ങള് സഹിക്കാനാവാതെ ആത്മഹത്യ ചെയ്ത നിരവധി യസിദി പെണ്കുട്ടികളുടെയും സ്ത്രീകളുടെയും കൂട്ടത്തില് അവളും.
- അവള് ജീവിച്ചിരിപ്പില്ലെന്നു വിശ്വസിക്കാനാവുന്നില്ല. ചിരിക്കുമ്പോള് തെളിയുന്ന നുണക്കുഴികള് മുന്നില് നിന്നു മായുന്നില്ല....
എല്ലാ കാലത്തും സംരക്ഷണത്തിനായി മറ്റുള്ളവരുടെ കനിവിനായി കേഴുകയായിരുന്നു സമധാന പ്രിയരായ യസിദികള്.
ഇല്ല, ഇനിയും കരഞ്ഞു തീര്ക്കാനുള്ളതല്ല യസീദികളുടെ ജീവിതം.
ആയുധമെടുക്കാന് സമയമായി.
നവ്രുസ് ക്യാമ്പില് കടുത്ത പരിശീലനത്തിലാണ് താനുള്പ്പടെയുള്ള യസിദി സ്ത്രീകളും പുരുഷന്മാരും.
യന്ത്ര തോക്കുകളും,മറ്റു യുദ്ധോപകരണങ്ങളും ഉപയോഗിക്കാനുള്ള പരിശീലനം.
വിഡ്ഢികളായ ഈ മൃഗങ്ങള് പറഞ്ഞു പരത്തുന്നത് പോലെ, ഞങ്ങള് ചെകുത്താനെ ആരാധിക്കുന്നവരല്ല...
എഴായിരത്തോളം വര്ഷം പഴക്കമുള്ള സംസ്ക്കാരമാണ് ഞങ്ങളുടേത്....യുഫ്രടീസ് നദിയുടെ തീരങ്ങളില് രൂപം കൊണ്ട മെസോ പൊട്ടേമിയന് സംസ്ക്കാരം.
ചെകുത്താന്റെ സന്തതികളെ, നിങ്ങള് തകര്ത്ത കുടുംബങ്ങള്... നിങ്ങള് തകര്ത്ത ജീവിതങ്ങള്....സംസ്കാരങ്ങള്...കാലം നിങ്ങള്ക്ക് മാപ്പ് തരില്ല....
ഞങ്ങളുടെ പ്രതികാരാഗ്നിയില് നീയൊക്കെ വെന്തുരുകും.
സിഞ്ചാര്, മൊസുള് പട്ടണങ്ങള് ഞങ്ങള് തിരിച്ചു പിടിക്കും... തടവിലുള്ള വീട്ടുകാരെ മോചിപ്പിക്കും....
അവസ്സാനത്തെ തുള്ളി രക്തം ചിന്തും വരെയും ഞങ്ങള് പോരാടും.
കുഞ്ഞനുജത്തി രഹാനയുടെ രക്തത്തിന്, അത് പോലെ അനേകം കുഞ്ഞു സഹോദരി മാരുടെ രക്തത്തിന്, എണ്ണിയെണ്ണി പകരം ചോദിക്കും...
അവസാനത്തെ തീവ്രവാദിയെയും ഞങ്ങള് കൊന്നൊടുക്കും...
യസീദികള് ഉണര്ന്നു കഴിഞ്ഞു. ...!
കറുത്ത ചെകുത്താന്മാരെ,
കരുതിയിരുന്നോളൂ.....
*******
https://www.facebook.com/photo.php?fbid=907065372637190&set=pb.100000012060771.-2207520000.1466506241.&type=3&theater
No comments:
Post a Comment